Lisbon/Madeira

Manzil haqida: Lissabon o‘zining joylashuvi tufayli “yetti tepalik shahri” sifatida tanilgan: shahar Tajo (Taju) daryosiga qaragan tik tepaliklar bo‘ylab yoyilgan. Romantik va kosmopolit bu shahar har bir burchagini kashf etishni istagan mehmonlarga o‘zining xos qizil tomlarini namoyish etadi. Lissabon tabiiy go‘zalligi va osoyishta muhitini bilan kishini hayratga soladi. Portugaliya poytaxtida ko‘plab muzeylar, kutubxonalar, ulkan port, cherkov va saroylar hamda Tajo daryosiga ochiladigan hayratomuz manzaralar mavjud. Ilgari Lissabon kambag‘al va tartibsiz shahar deb hisoblangan. Hozir esa u XIV–XV asrlardagi – Braziliyadan Hindistongacha cho‘zilgan ulkan imperiya davridagi – shukuhini qayta tiklamoqda. Bunga 1998-yilda o‘tkazilgan Butunjahon ko‘rgazmasi turtki bo‘ldi: Tajo ustidan yangi ko‘prik qurildi va shaharning metro tarmog‘i yangilandi. Shaharning tiklanishi 2004-yilgi Yevropa chempionati uchrashuvlariga mezbonlik qilish, 2005-yilda esa MTV Music Awards marosimini o‘tkazish bilan davom etdi. Eng chiroyli binolarining ko‘pi XIV–XV asrlarga oid bo‘lib, ayniqsa Belem tumanida joylashgan. XVIII asrga oid ko‘plab binolar ham bor; ularning aksariyati markaziy Baixa hududida bo‘lib, 1755-yilda sodir bo‘lgan vayronkor zilziladan so‘ng deyarli to‘liq qayta qurilgan. “Yetti tepalik” ustida joylashgan tarixiy markaz tik ko‘chalar va manzarali tor so‘qmoqlar bilan ajralib turadi. Shaharning g‘arbida 10 km maydonni egallagan va Yevropadagi eng yirik o‘rmon bog‘laridan biri bo‘lgan Monsanto o‘rmon bog‘i – Lissabonning “o‘pkasi” joylashgan. Poytaxtning ulkan porti uchta kruiz kemalari qabul qiluvchi terminalga ega bo‘lib, hozirda Yevropaning Atlantika sohilidagi eng band port hisoblanadi. Asrlar davomida shakllangan tarixiy Lissabon jasur, dadil ruhga ega bo‘lib, qadimiylikni va zamonaviylikni, an’anani va yangilikni uyg‘unlashtiradi. Eski mahallalarda sayr qilganda kichik restoranlarda kuylanayotgan an’anaviy fado qo‘shiqlarini eshitish mumkin. Tepalikdagi Bairro Alto tumanida o‘nlab restoran va barlar tor ko‘chalar bo‘ylab saf tortgan bo‘lib, jazz, rege, elektron musiqa havoni to‘ldiradi va bazm tonggacha davom etadi. Shahar bo‘ylab tarqalgan tungi klublar daryo bo‘yidagi eski omborlar yoki XVIII asr saroylari kabi tarixiy binolardan mahorat bilan foydalanadi. Lissabon o‘zini dunyoga har bir didga mos rang-barang imkoniyatlarga ega, kosmopolit va jonli shahar sifatida namoyish etadi, ayniqsa yoz oylarida ko‘plab barlar, terrasalar va restoranlar odamlar bilan to‘lib-toshadi.

Manzil haqida: Funchalga kelganingizda uning ulkanligi sizni hayratga soladi. Uylar va yana uylar dengiz bo‘yidan balandlikka qarab ko‘tarilib, butun Funchalni tabiiy amfiteatrga aylantiradi. Funchal Madejra orolining asosiy savdo, turizm va madaniy markazidir. Shaharning eski qismi – Zona Velha – hanuzgacha jonli mahalliy hayotni saqlagan bo‘lib, oroldagi eng zamonaviy maskan hisoblanadi. Tor, tosh yotqizilgan ko‘chalarda sayr qilish, kichik, qiziqarli muzeylar, do‘konlar, qahvaxonalar va tuz hidi kelib turadigan eski port hududini kezish – chinakam zavq. Kechasi bu mahalla jonlanib ketadi: restoranlar odamga to‘ladi, Rua de Santa Maria esa maroqli hordiq izlayotgan yoshlarning uchrashuv nuqtasiga aylanadi. Orolning betakror o‘simlik dunyosidan bahramand bo‘lish uchun Funchaldan chiqish shart emas. Shaharning chekka hududlarida Jardim Botânico, Quinta da Boa Vista, Palheiro Gardens va Monte Palace Tropical Gardens kabi ajoyib bog‘lar joylashgan bo‘lib, ularga shahar markazidan osma yo‘l (kanat yo‘li) orqali borish mumkin. Shuningdek, ko‘rishga arziydigan boshqa joylar ham bor: rang-barang meva-sabzavotlar va hunarmandchilik buyumlari sotiladigan Mercado dos Lavradores bozori; XV asrga oid sobor; Quinta das Cruzes majmuasi va Adegas São Francisco vino omborlari. Kichkina bo‘lishiga qaramay, band port shahri bo‘lgan Funchalni yoqtirish uchun sabablar juda ko‘p: u mehmonlarga juda ko‘p narsalarni taklif etadi.